„Miðlarnir hefðu a.m.k. átt að segja að Blake væri transkona, en það hefði verið skömm skárra að greina ekki frá kynferðinu en að staðhæfa að um konu væri að ræða,“ svo ritar ritstjóri Morgunblaðsins í leiðara dagsins.
Þar tekur hann dæmisögu frá breskum fjölmiðlum og segir þá ranglega hafa farið með staðreyndir í máli, sem vakti óhug margra, um konu sem bútaði kött og setti í matvinnsluvél. Ku staðreyndarvillan vera samkvæmt ritstjóra sú að ódæðið var drýgt af karlmanni en ekki konu:
„… þar til í ljós kom að Scarlet Blake er raunar karl, en er trans og skilgreinir sig sem konu,“ segir í leiðaranum og ritstjóri heldur áfram.
„Það gerðu margir helstu fjölmiðlar í Bretlandi sér að góðu og sögðu þá frétt að hinn dæmdi væri kona. En voru fjölmiðlarnir þá að greina almenningi satt og rétt frá? Voru þeir ekki beinlínis að villa um fyrir lesendum sínum? Það gerðu þeir til þess að þóknast nýjum en nokkuð óútræddum viðmiðum um kyn, kynferði og kyngervi.
Máli sínu til stuðnings er vitnað í rithöfundinn J.K. Rowling sem hefur fengið á sig gagnrýni fyrir viðhorf sín á málefninu: „J.K. Rowling dyggur femínisti, andæfði og benti á að glæpatölfræði væri gagnslaus ef kynferðisglæpir karla væru kenndir konum.“
Opinberar ritstjóri því næst skilning sinn á málefni transfólks:
„Hugmyndafræðilegar rangfærslur eru ekki blaðamennska.“
Ritstjóri segir það merg málsins.
„Í þessu tilviki voru miðlarnir þar fyrir utan ósamkvæmir sjálfum sér, því í réttarhaldinu kom fram að Blake skilgreinir sig einnig sem kött og mjálmaði fyrir kviðdóminn því til sönnunar. Um það vildu miðlarnir ekki reyna á trúgirni lesenda, að maður hefði verið rotaður, kyrktur og hent út í á af ketti. En til hvers að segja fréttir, nú eða að kveða upp dóma, ef staðreyndir eru afstæðar og valkvæðar?
Þær eru það ekki,“ skrifar ritstjórinn að endingu, máli sínu til varnar.