Icelandair gerir ekki ráð fyrir Boeing-737 MAX vélum í flota sínum næsta sumar. Þetta kemur fram í tilkyningu sem félagið sendi frá sér seint í gærkvöldi.
Eins og kunnugt er voru vélarnar kyrrsettar snemma á síðasta ári vegna framleiðslugalla, sem leiddi til þess að á fjórða hundrað manns týndi lífi í tveimur flugslysum. Síðan þá hefur kyrrsetningin ítrekað verið framlengd. Í gær tilkynntu verksmiðjur Boeing enn frekari tafir á því vélarnar fari í loftið á nýjan leik og í framhaldinu sendi Icelandair frá sér tilkynninguna.
Þar segir meðal annars að vegna ráðstafana sem félagið hafi þegar gripið til verði áhrifin af þessu á útgefna flugáætlun félagsins óveruleg og fjárhagsleg áhrif mun minni í ár en í fyrra. Búið sé að leigja þrjár Boeing 737-800 vélar á hagstæðari kjörum en á síðasta ári og tilteknum fjölda Boeing 757 véla verði haldið lengur í flota Icelandair en áður hafði verið áætlað.
Þá munu áhafnir Icelandair fljúga leiguvélunum en ekki áhafnir leiguflugfélaga sem leigðar voru árið 2019.
Í tilkynningunni segir að félagið reikni með minnst jafnmörgum farþegum og í fyrra.
Frá þessu er greint á vefsíðu RÚV.