Allt lítur út fyrir að árás sem óttast var að Íranir ætlaði að gera á fjandvini sína í Ísrael sé að hefjast; bandarískir og ísraelskir embættismenn segja í það minnsta tugi dróna hafa verið senda af stað frá Íran áleiðis til Ísraels.
Loftvarnarflautur hafa verið þeyttar í Jerúsalem og miklir hvellir hafa heyrst í borginni að sögn erlendra fjölmiðlavíða um heim.
Nú er búið að loka lofthelgi Íraks og Jórdaníu; þau lönd liggja á milli Írans og Ísraels.
Yfirvöld í Ísrael ætla að loka lofthelgi sinni rétt eftir miðnætti að staðartíma; Íranir hafa hótað árás eða árásum á Ísrael allt síðan síðan Ísraelsher sprengdi sendiráð Írana í borginni Damaskus í Sýrlandi í byrjun mánaðarins; þá féllu sjö íranskir hermenn, þar af tveir hershöfðingjar.
Um langt skeið hefur andað mjög köldu á milli Ísraels og Írans og hafa Ísraelsmenn oft sakað Írani um að fjármagna Hamas, sem fer með stjórn á Gaza.
Sjö Íslendingar, auk nokkurra barna þeirra, eru búsettir í Ísrael. Flestir í borginni Tel Aviv. Ekki er annað vitað á þessari stundu en að Íslendingarnir séu óhultir.