Afgreiðslufólk á bensínstöð kallaði til lögreglu vegna ölvaðs manns sem var að sögn með hótanir. Við komu lögreglu á vettvang kannaðist maðurinn ekki við neitt og var honum því vísað á brott. Á því stigi lágu engar kröfur fyrir í málinu. Nokkru síðar barst lögreglu önnur tilkynning um aðila sem væri með hótanir í verslun skammt frá og reyndist það vera sá hinn sami. Ofbeldisseggurinn streittist á móti handtöku og var hann færður í lögreglutök og yfirbugaður. Hann var síðan læstur inni í fangaklefa þar sem hann sefur úr sér.
Þjófur var við iðju sína í gleraugnaverslun þar sem sást til hans. Verslunareigandi gat gefið lýsingu á meintum geranda. Málið er í rannsókn.
Ölvaður maður var til vandræða á Austurvelli og var lögregla kölluð til. Hann hafði áður verið að áreita gesti á bar í nágrenninu og sýnt af sér ógnandi hegðun. Maðurinn var handtekinn við komu lögreglu á vettvang og fluttur á lögreglustöð þar sem málið fór í hefðbundið ferli.
Lögregla var send ásamt sjúkraliði í heimahús þar sem aðili kvaðst hafa orðið fyrir líkamsárás. Við komu viðbragðsaðila á vettvang brást hann ókvæða við og sýndi af sér ógnandi hegðun gagnvart lögreglu og sjúkraliði. Þrátt fyrir nokkrar fortölur af hálfu lögreglu og sjúkraliðs á vettvangi náði maðurinn engri stjórn á sér og fór að hann var handtekinn eftir að hafa brotið rúðu í hamaganginum. Málið er í rannsókn.
Lögregla var send til aðstoðar við leigubílstjóra sem hafði lent í vandræðum með farþega sem neitaði að borga fargjald. Leigubílstjóranum var leiðbeint með framhaldið af hálfu lögreglu.
Tilkynnt var um hnupl í verslun. Málið afgreitt með skýrslutöku á vettvangi.