Foreldrar og forsjáraðilar barna í Víðistaðaskóla eru beðin um að hafa varann á vegna karlmanns sem veist hefur að ungum börnum og elt þau í norðurbæ Hafnarfjarðar undanfarið. Tölvupóstur barst þeim í vikunni frá skólanum.
Í tölvupósti sem deildarstjórar miðstigs og yngsta stigs Víðistaðaskóla sendu foreldum og forráðamönnum barna í skólanum, í gær, er fólk beðið um að brýna fyrir börnum sínum að fara ekki út af skólalóðinni á skólatíma vegna manns sem veist hefur að börnum og elt þau undanfarna viku. Þá er fólk beðið um að hlusta vel á börnin og koma upplýsingum til lögreglu ef við á.
Mannlíf fjallaði um málið nýlega en samkvæmt móður í hverfinu er uggur í fólki vegna mannsins sem hrellt hefur börnin undanfarið.
Sjá einnig: Karl með yfirvararskegg herjar á börn í Hafnarfirði:„Fólk slegið og óöruggt að senda börnin ein út“
Hér má sjá tölvupóstinn sem sendur var á foreldra:
Kæru foreldrar/forsjáraðilar
Við viljum upplýsa ykkur um mál sem kom upp í hverfinu þar sem maður veittist að ungum börnum og elti þau, er í vinnslu hjá Lögreglu. Margir nemendur voru smeykir, þá sérstaklega á yngsta stigi og var málið rætt við þá nemendur. Atvikið átti sér ekki stað á skólatíma en við biðjum ykkur að brýna fyrir börnum ykkar að ekki er leyfilegt að fara út af skólalóð á skólatíma.
Við biðjum ykkur um að hlusta vel á börnin ykkar og koma upplýsingum, ef við á, til Lögreglu.
Ef einhverjar spurninga vakna endilega hafið samband við okkur.
Kær kveðja
Elísa Ösp deildarstjóri miðstigs og Helga Þórdís deildarstjóri yngsta stigs