Íslensk kona á fertugsaldri reyndi flytja með sér 86.500 evra, sem eru rúmar 13 milljónir króna, í reiðufé til Amsterdam í farangri í gegnum Keflavíkurflugvöll.
DV greinir frá málinu en samkvæmt ákæru sem fréttamiðilinn hefur undir höndum segir að konan hafi í desember árið 2022 tekið við fénu frá óþekktum aðila og átt að koma því til Hollands. Á konunni að hafa verið ljóst að peningurinn væri ávinningur af refsiverðum brotum. Konan var stöðvuð á Keflavíkurflugvelli og fundust peningarnir við leit í farangri hennar en samkvæmt DV býr hún í úthverfi í Reykjavík.
Konan hefur verið ákærð fyrir peningaþvætti og krefst héraðssaksóknari þess að hún verði dæmd til refsingar, greiðslu alls sakarkostnaðar og krafist er upptöku á evrunum.
Málið verður þingfest í Héraðsdómi Reykjavíkur þann 28. ágúst.