Björn Leví Gunnarsson, alþingismaður Pírata, gefur Stefáni E. Stefánssyni blaðamanni Moggans ekki háa einkunn og kallar hann lygara. Einkunn þingmannisins er tilkomin vegna þess að Stefán fékk hann í þátt til sín í Moggasjónvarpinu og vitnaði síðan til orða hans um Menntamálastofnun á bjórkvöldi í hlaðvarpi Þjóðmála og fór að sögn rangt með.
Það sætir reyndar meiri furðu að þáttastjórnandinn niðurlægði viðmælanda sinn í heyranda hljóði og gaf til kynna að hann væri bæði illa klæddur og sóðalegur. „Björn Leví Gunnarsson mætti til mín í Spursmál á föstudaginn síðasta. Hann var í ósamstæðum sokkum. Hann var ekki í skóm. Það er allt í lagi. Það er vel skúrað uppi á Mogga …,“ hafði DV eftir Stefáni frá bjórkvöldinu. Þetta er óvenjulegt þar sem venjulega sýnir fjölmiðlafólk viðmælendum sínum virðingu.
Stefán hefur reyndar verið stríðsglaður og átti nýlega í hörkudeilum við Gunnars Smára Egilsson, foringja Sósíalista, sem ráðlagði honum að leita sér hjálpar hjá ráðgjöfum SÁÁ.
Áskrift að Mogganum kostar um 120 þúsund krónur á ári. Gegn því gjaldi fær fólk blaðið heim og aðgang að Stefáni …