Pawel Bartoszek, varaborgarfulltrúi Viðreisnar, er ekki vinsæll hjá mörgum íslenskum knattspyrnuaðdáendum þessa stundina. Ástæðan er sú að hann taldi það væri ekki sanngjarnt að skattgreiðendur greiddu 50 milljónir króna til þess að knattspyrnuliðs Víkings gæti leigt ljós til að spila heimaleiki í Evrópukeppni seint á kvöldin um hávetur. Pawel stakk meðal annars upp á því að Víkingur eða UEFA myndi borga þessa upphæð fyrst það væri svona mikilvægt að þessir leikir færu fram klukkan 20:00 í desember á Íslandi.
Haraldur Haraldsson, framkvæmdastjóri Víkings, var mjög ósáttur við Pawel og sagði skrif hans vera ömurlegt pólitískt útspil og fjarri staðreyndum. Haraldur hafði sjálfur farið í viðtöl í fjölmiðlum og krafist þess að stjórnvöld myndu borga kostnaðinn við ljósaleiguna. Í viðtölunum minnist Haraldur reyndar ekkert á þær mörg hundruð milljónir sem félagið fær fyrir þátttöku sína í keppninni.
Til allrar hamingju samþykkti UEFA að lokun að leikirnir fari fram í dagsbirtu og því leigan á ljósunum óþarfi. Gárungar telja þó mögulegt að Haraldur hafi viljað leigja þau til að leita að þessum mörg hundruð milljónum sem hann virðist hafa týnt …