Það mættu í kringum 20 manns til að mótmæla fyrir utan hús í Garðabæ árið 2003.
Þessir 20 einstaklingar voru mættir fyrir utan heimili Þormóðs Jónssonar en hann var einn af 20 eigendum Hótel Búða á Snæfellsnesi. Verktakarnir héldu því fram þeir ættu inni í kringum 53 milljónir fyrir ýmis verk.
„Þessi þátttaka er bara toppurinn á ísjakanum. Áður en hann ók burt á bílnum sínum hreytti hann miklum ónotum í okkur og taldi þetta vera mikinn dónaskap við sig og sína fjölskyldu að við værum að minna á okkur hér. Auðvitað er það ekki þægilegt fyrir manninn. Hann minntist aftur á móti ekkert á þann dónaskap sem hann hefur sýnt okkur með því að greiða okkur ekki fyrir unnin verk fyrir vestan. Við erum margir verktakar sem höfum ekki fengið greitt og um margar milljónir að ræða. Við höfum orðið varir mikilla „leikfimisæfinga“, þ.e. seldar eignir á milli kennitalna þannig að menn grípa bara í tómt. Við höfum einnig ljósrit af afsölum og kaupsamningum frá sýslumanninum í Stykkishólmi þar sem skuldabréf fyrir eigninni Fmnast ekki. Við höfum reynt árangurslaust fjárnám. Við þetta getum við ekki sætt okkur lengur. Þetta er bara fjárglæframennska,“ sagði Baldur Bjömsson hjá Gólflögnum í Súðarvogi við DV um málið.
Sjálfur sagði Þormóður að Byggðastofnun og Landsbankinn væru að vinna í þessu með sér og þetta væri ekki glatað fé. „Þeir eru með ærumeiðandi ummæli og rógburð í minn garð og hótanir auk þess að vera hér án leyfis lögreglu, og ég mun leggja fram kæru á hendur þeim. Þeim verður gert að koma með afsökunarbeiðni,“ sagði Þormóður um málið við DV.
Ýktar tölur
Nokkrum mánuðum síðar var Þormóður í viðtali hjá Morgunblaðinu þar sem hann ræddi launamálin.
„Á þeim tíma vorum við mjög aðkrepptir með peninga þar sem við héldum að við fengjum lánið. Tillagan var komin frá Byggðastofnun og Landsbankinn búinn að samþykkja og þá héldum við að málið væri leyst. Við vorum að brenna inni á tíma með að klára. Þá voru menn sem höfðu verið verktakar hjá okkur áður orðnir langþreyttir. Ég fékk sendar alls kyns hótanir um barsmíðar og fleira. Þeir mættu heim til mín með kröfuspjöld um að við værum í kennitölusvikum. Það var hins vegar allt uppi á borðinu. Það var ekkert undirförult við fjármögnun verkefnisins og ekki verið að svíkja nokkurn mann. Mér fannst afskaplega leiðinlegt að þetta mál hafi farið í fjölmiðla órökstutt og án þess að haft væri samband við okkur. Þarna var verið að ráðast á mig sem einstakling. Mér þykir það miður ef fjölmiðlar ætla að taka þátt í þannig innheimtuaðgerðum í þjóðfélaginu. Við viðurkenndum alltaf að skulda þessum mönnum peninga.
Allir þeir aðilar sem stóðu að þessum aðgerðum hafa fengið greitt. Það stóð aldrei neitt annað til en að greiða þessar skuldir. Hins vegar lá það alltaf fyrir að við þurftum að fá þessa fjármögnun, það var ekkert leyndarmál.“
Þá sendi stjórn Hótel Búða frá sér yfirlýsingu þar sem sagt var að skuldin hafi verið rúm ein milljón en ekki 53 milljónir.