Búðaþjófar settu lit sinn á síðdegið í gær. Þjófarnir voru víða um borgina á ferli við iðju sína og komst upp um nokkra þeirra.
Fingralöng kona var staðin að verki við þjófnað í verslun í austurborg Reykjavíkur. Konan reyndist ekki vera samvinnuþýð og var handtekin og flutt á lögreglustöðina við Hverfisgötu. Tekin var skýrsla af búðaþjófinum sem síðan var látinn laus í framhaldinu. Annar búðaþjófur var gripinn í nærliggjandi hverfi. Sá játaði fúslega og var sleppt eftir skýrslu á vettvangi. Alls voru fjórir gripnir fyrir þjófnaði úr verslunum.
Tilkynnt var um hópslagsmál í austurborginni. Einn fluttur á bráðamóttöku til aðhlynningar. Málið er í rannsókn og unnið með Barnavernd.
Einn var handtekinn, grunaður um fíkniefnamisferli. Málið fgreitt á vettvangi með vettvangsskýrslu.
Lögreglan var með klippurnar á lofti í Hafnarfirði. Skráningarnúmer tekin af bifreið vegna vanrækslu á greiðslu trygginga.
Þrír ökumenn voru stöðvaðir við akstur þar sem þeir voru að tala í farsíma án þess að nota handfrjálsan búnað. Hinir málglöðu voru sektaðir. Hver þeirra þarf að greiða sem nemur 40 þúsund krónum.
Ökumaður var stöðvaður í akstri í Hafnarfirði. Reyndist hann vera réttindalaus. Mál hans afgreitt með hárri sekt.
Tónelskur íbúi í Breiðholti hélt vöku fyrir fólki með því að spila tónlist á útopnuðu. Lögreglan mætti á staðinn og veitti tiltal.Húsráðandinn lofaði bót og betrun og lækkaði umsvifalaust í græjunum og ró færðist yfir hverfið.
Tilkynnt var um þjófnað úr bifreið í Breiðholti. Málið var afgreitt á vettvangi afbrotsins.