Ragnheiður Tryggvadóttir, vöruhönnuður og skríbent á auglýsingadeild Vísis, er sólgin í ævisögur, drama og krimma. Hér segir hún frá þeim bókum sem hafa haft einna mest áhrif á hana.
Heillandi flökkulíf
„Bækurnar um Heiðu og Húsið á sléttunni koma strax upp í hugann. Ég tengdi sérstaklega við Heiðusögurnar þar sem söguhetjan er nafna mín og sveitalubbi eins og ég. Fleira áttum við þó kannski ekki sameiginlegt. Ég hafði til dæmis ekki komið til stórborgar þegar ég var að lesa sögurnar um Heiðu og fannst hún dálítið vanþakklát að una sér ekki í Frankfurt. Flökkulífið á Ingalls-fjölskyldunni um Norður-Ameríku fannst mér merkilegt og gaman að lesa lýsingarnar á daglegum verkum og hvernig þau komust af. Mér fannst þau stanslaust vera að troða hálmi í dýnurnar sínar.“
Enginn dans á rósum
„Allt önnur Ella, ævisaga eða þroskasaga Elínar Þórarinsdóttur, eftir Ingólf Margeirsson, var fyrsta ævisagan sem ég las og hafði heilmikil áhrif á mig, kannski af því að ég var ekki nema ellefu ára þegar ég las hana. Þessi bók er auðvitað fullorðins, lífshlaup Elínar var ævintýralegt en enginn dans á rósum. Þarna segir frá heimi áfengis og ofbeldis og ýmsu svakalegu sem ég hafði engan þroska til að lesa. Mér fannst merkilegt að þetta væri alvöru en ekki skáldað og var gáttuð á því að einhver skildi fást til að segja svona frá, en heilluð um leið. Þarna uppgötvaði ég að ævisögur eru auðvitað mest spennandi sögurnar.“
Átakanlegar bækur
„Ég er sökker fyrir mannlegu drama og sögulegum skáldsögum og bækurnar Bókaþjófurinn, eftir Markus Zusak og All the light we can not see, eftir Anthony Doerr, sátu lengi í mér eftir lesturinn. Í báðum þessara bóka er sögusviðið átakanlegt og persónurnar margslungnar, venjulegt fólk sem reynist búa yfir ótrúlegum kjarki og styrk á voveiflegum tímum seinni heimsstyrjaldarinnar þegar minnstu mistök geta kostað fólk lífið.“