Rappstjarnan Eminem er að verða afi en hann greinir frá í tónlistarmyndbandi við lagið Temporary en lagið er að finna á nýjustu plötu kappans.
Það er hún Hailie Jade Scott, dóttir rapparans, sem á von á barninu en ekki er vitað hversu langt hún er gengin en hún gifti sig í maí á þessu ári. Eminem hefur í gegnum tíð rappað reglulega um samband sitt við dóttur sína og hefur hún komið fram í nokkrum lögum hans.
The Death of Slim Shady (Coup de Grâce), nýjasta plata hans, kom út í sumar og hefur fengið góðar viðtökur hjá hlustendum en Eminem er af flestum rapphausum talinn einn besti rappari allra tíma. Þá hefur hann selt ansi margar plötur en almennt er talið að Eminem hafi selt 330 milljónir platna á ferlinum og er hann einn af tíu vinsælustu tónlistarmönnum allra tíma ef tekið er mið af slíku.