Skyndifundur þingflokks Sjálfstæðisflokksins í gær er einkenni um mikla taugaveiklun forystu flokksins sem leitar útgönguleiðar úr ríkisstjórn sem augljóslega er stefnulaus og hver höndin upp á móti annarri.
Hermt er að Bjarni Benediktsson hafi með skyndifundinum viljað tryggja bakland sitt til að gera gripið til þeirra aðgerða sem þarf gagnvart Vinstri-grænum sem eru í andarslitrunum og hvorki vilja né geta látið frekar undan Sjálfstæðisflokknum í málum sem hefðu átt að vera þeim heilög.
Almennt viðhorf er að flokkarnir þrír hangi saman vegna fjárhagslegra hagsmuna. Minnki fylgi þeirra á þessu ári lækka framlögin hlutfallslega. Andrúmsloftið er þó svo baneitrað að jafnvel peningar færa sjálfstæðismönnum ekki ró.
Fátt heyrist af leynifundinum í gær annað en það að engar ákvarðanir hafi verið teknar. Sú staða að tefla Bjarna fram í kosningum þykir mörgum afleit. Hann er óvinsælasti ráðamaður Íslands frá upphafi og stýrir ríkisstjórn sem hefur minnsta fylgi sem mælt hefur verið.
Einn möguleikinn er sá að Bjarni rjúfi þing og segi svo af sér sem formaður og afhendi Þórdísi Kolbrúnu Reykfjörð Gylfadóttur varaformanni keflið. Vandinn er sá að Þórdís á ekki upp á pallborðið hjá flokksmönnum eftir mistök á borð við lokun sendiráðs Íslands í Moskvu.
Bjarni er í örvæntingu að reyna að skapa sér stöðu til þess að sannfæra fólk um að hann geti sjálfur lágmarkað fylgistjón flokksins og jafnvel náð að verða aftur forsætisráðherra. Leynifundurinn var til þess að sannfæra fólk svo hann geti fyrirvaralítið rofið þing og efnt til kosninga …