„Ég hef ákveðið að deila með ykkur bréfi frá ríkissaksóknara þar sem ákvörðunin um niðurfellingu málsins gegn mér er rökstudd ítarlega. Þetta er gert til að tryggja að allir fái réttar upplýsingar um málið og að fréttaflutningur byggi á staðreyndum. Ég vona að þið kynnið ykkur vel efni bréfsins áður en frekari umfjöllun fer fram. Ég hvet til þess að málið sé skoðað út frá þeim ítarlega rökstuðningi sem ríkissaksóknari hefur veitt, til að tryggja að umfjöllun verði eins sanngjörn og nákvæm og kostur er. Virðingarfyllst, Sverrir Einar Eiríksson.“
Hér á eftir er fréttatilkynningin frá Sverri í heild sinni sem og bréf ríkissaksóknara:
„Þann 18. september 2023 sendi lögmaður minn, Sveinn Andri Sveinsson, inn kvörtun til Nefndar um eftirlit með lögreglu (NEL) vegna ólögmætrar handtöku og óeðlilegra afskipta lögreglu af veitingastaðnum mínum, B5, þann 17. september sama ár.
Í kjölfar þessara kvartana brást lögreglan við með því að kæra mig fyrir að tálma störf þeirra og ráðast á lögregluþjón.
Bæði Héraðssaksóknari og Ríkissaksóknari vísuðu kærunni frá sem tilhæfulausri.
Það kemur skýrt fram á myndbandsupptökum frá atvikinu að ég hvorki hindraði störf lögreglu né réðst á lögreglumann. Myndefnið sýnir að ég beygi mig niður með hendur í vösum til að heyra hvað lögreglumaðurinn hafði að segja.
Eftir að Ríkissaksóknari felldi málið niður þann 19. október 2024, með ítarlegum rökstuðningi, hef ég lagt fram formlega kæru á hendur lögreglumanni nr. 2020 fyrir rangar sakargiftir. Ég hef einnig kvartað yfir störfum þessa lögreglumanns til NEL og sent bréf til þingmanna þar sem ég hvet til þess að nefndin verði efld til að koma í veg fyrir að sambærileg atvik endurtaki sig. Það er nauðsynlegt að borgarar þurfi ekki að óttast óréttmætar aðgerðir lögreglu.
**Ákvæði almennra hegningarlaga sem brotin voru**
Ég tel að hegðun lögreglumanns nr. 2020 brjóti gegn eftirfarandi ákvæðum almennra hegningarlaga:
1. **Rangar sakargiftir (148. gr.)** – Í 148. grein almennra hegningarlaga segir að hver sá sem vísvitandi leggur fram rangar eða villandi sakargiftir til þess að valda öðrum ámæli eða refsingu, getur átt yfir höfði sér refsingu. Með því að gefa rangar upplýsingar í lögregluskýrslu reyndi lögreglumaðurinn að skapa falskt sakamál gegn mér, sem brýtur alvarlega gegn grundvallarreglum um sanngirni og réttlæti í störfum lögreglu.
2. **Rangt vitni (142. gr.)** – Ef lögreglumaður gefur falskan vitnisburð fyrir dómstólum eða í opinberri rannsókn, er það brot á 142. grein. Rangar upplýsingar sem lögreglumaðurinn setti fram í skýrslu sinni leiddu til rangrar málsmeðferðar og alvarlegs réttarbrests.
3. **Misnotkun á valdi (131. gr.)** – Samkvæmt 131. grein getur lögreglumaður verið refsað ef hann misnotar vald sitt í starfi. Með því að leggja fram rangar sakargiftir braut lögreglumaður nr. 2020 gegn grundvallarreglum um sanngirni og réttlæti. **Áætlanir um frekari kærur** Ég íhuga nú að leggja fram frekari kærur vegna annarra aðgerða lögreglu, þar á meðal ólögmætrar innsiglunar á Exit, sem var framkvæmd í lok apríl á þessu ári. Þetta ferli hefur verið mjög þungbært, og það er erfitt að skilja hvers vegna lögreglan hefur beitt mig svona harkalegum aðgerðum. Ég krefst þess að tekið verði á valdníðslu og óréttlæti í starfsemi lögreglu og að stjórnvöld tryggi aukið eftirlit með störfum hennar til að koma í veg fyrir að slík mál endurtaki sig.