Skoðanakönnun Prósents sem var í loftinu fyrir nokkru hefur vakið upp spurningar. Þar var um að ræða spurningar um afstöðu til mögulegs þingframboðs Dags B. Eggertssonar, fyrrverandi borgarstjóra, fyrir Samfylkinguna. Meðal annars var spurt hvort fólk vildi sjá hann í oddvitasæti á lista eða neðar.
Innan forystu Samfylkingar kannast enginn við að flokkurinn hafi pantað könnunina. Þá er hermt að Mogginn, sem gjarnan á í viðskiptum við Prósent, hafi ekki látið gera umrædda könnun. Það furðulega er að niðurstöðurnar hafa hvergi komið fram.
Sá orðrómur er á sveimi að Dagur og aðilar honum tengdir hafi látið gera könnunina dularfullu og niðurstöðu hennar hafi varpað svo neikvæðu ljósi á Dag að best væri að láta kyrrt liggja. Nú virðist vera að koma á daginn að Dagur er óvinsælli eftir 10 ára borgarstjóratíð en aðdáendur hans höfðu talið og það sé hárrrétt metið hjá Kristrúnu Frostadóttur að geyma hann í bakherbergjum flokksins með Þórði Snæ Júlíussyni og öðrum minnipokum …