Volodymyr Zelensky Úkraínuforseti segist ekki vera búinn að ræða við Bjarna Benediktsson um áframhaldandi viðskipti Íslands við Rússlands í gegnum Belarús. Úflutningsbann til Rússlands er í gildi hér á landi vegna stríðsins í Úkraínu.
Vandræðaleg uppákoma varð á sameiginilegum blaðamannafundi tengdum þingi Norðurlandaráðs í morgun þegar Aðalsteinn Kjartansson, blaðamaður á Heimildinni spurði gáttaðan Zelensky spurningar sem kom sér illa fyrir Bjarna Benediktsson. „Zelensky forseti, ertu búinn að ræða við forsætisráðherra Íslands um áframhaldandi útflutning Íslands til Rússlands í gegnum milliliði í Belarús?“
Þögn sló á salinn og Bjarni Benediktsson sást horfa stjarfur fram í salinn. Zelensky svaraði, að því er virðist nokkuð gáttaður: „Hef ekki rætt það ennþá en við munum halda áfram samtali okkar.“
Aðalsteinn spurði forsetann þá hvort hann hefði vitað af þessu. „Nei, ekki smáatriðin,“ svaraði Zelensky og bætti við: „Þú mátt segja mér frá því og ég skal svo ræða það við forsætisráðherrann.“ Vakti svarið nokkra kátínu í salnum.
Aðalsteinn sagði þá að vörur séu sendar til Belarús þar sem þær eru endurpakkaðar og síðan seldar til Rússlands. Zelensky svaraði engu en Aðalsteinn bætti þá við: „Þannig að þú kannski ræðir þetta við forsætisráðherrann?“ Zelensky svaraði þá: „Ég geri það, ég geri það. Þakka þér kærlega fyrir“.
Bjarni Benediktsson sleit blaðamannafundinum eftir þessi orðaskipti Aðalsteins og Zelensky.
Hér má sjá myndband af samskiptunum: