- Auglýsing -
Björn Birgisson spyr hvort stefna flokkanna sem Jakob Frímann Magnússon hefur verið í framboði fyrir, skipti hann engu máli.
Samfélagsrýnirinn glöggi, Björn Birgisson frá Grindavík, skrifaði Facebook-færslu þar sem hann furðar sig á ákvörðun Jakobs Frímanns Magnússonar, að bjóða sig fram fyrir hönd Miðflokksins, nú þegar hann hefur verið rekinn úr Flokki fólksins. Jakob Frímann er síður en svo nýgræðingur þegar kemur að Alþingiskosningum en Björn telur upp fyrri tilraunir popparans skemmtilega í færslunni sem hefst á eftirfarandi máta:
„Allt er þá fernt er!
Eða hvað?
Jakob Frímann Magnússon hefur verið alþingismaður Norðausturkjördæmis síðan 2021 og setið fyrir Flokk fólksins.
**********
Áður, snemma á öldinni, var hann varaþingmaður Reykjavíkurkjördæmis suður og sat á þingi í desember 2004 fyrir Samfylkinguna.
**********
Hann var í fyrsta sæti á lista Íslandshreyfingarinnar í Suðvesturkjördæmi (Kraganum) í kosningunum vorið 2007 og hlaut listinn sem hann leiddi 3,5% atkvæðanna í kjördæminu.“
Að lokum spyr Björn hvort stefna flokkanna skipti engu máli:
„Nú er hann skyndilega kominn í annað sætið hjá Miðflokknum í Reykjavík norður!!
Þá spyr maður sig:
Skiptir stefna flokkanna engu máli eða er hún kannski eins hjá þessum ólíku flokkum að mati Jakobs Frímanns Magnússonar?“