Landsliðsmarkmaðurinn Jökull Andrésson er að leita sér að nýju félagi en í tilkynningu frá Reading F.C. á Englandi kemur fram að félagið hafi komist að samkomulagi við Jökul um að rifta samningi félagsins við markmanninn.
Jökull, sem er 23 ára gamall, hefur verið í herbúðum félagsins frá 2017 en hefur aldrei fengið tækifæri til að spila með aðalliði Reading. Hann hefur þess í stað verið lánaður til liða í neðri deildum Englands og hefur þótt standa sig með prýði. Hann spilaði með Aftureldingu í sumar þegar liðið tryggði sér sæti í efstu deild karla í knattspyrnu.
Stuðningsmenn Reading eru mjög ósáttir og telja þá meðferð sem Íslendingur hefur fengið hjá félaginu mjög ósanngjarna ef hægt er að taka mark á Twitter og spjallborði stuðningsmanna. Telja þeir aðra markmenn hjá félaginu verri og það muni koma fljótlega í ljós að um mistök hafi verið að ræða. „Toppmarkmaður,“ sagði einn stuðningsmaður félagsins um Jökul á Twitter.
Jökull hefur spilað einn landsleik með íslenska landsliðinu í knattspyrnu en hann gerði það árið 2022.