Maður um tvítugt var fluttur á sjúkrahús eftir að ráðist var á hann með hafnarboltakylfu á Sauðárkróki en Dagur-Tíminn greindi frá þessu árið 1996.
Forsaga málsins er að maðurinn var að skemmta sér á dansleik í Miðgarði á Sauðarkróki í desember árið 1996 þegar 19 ára gamall maður réðst á hann með hafnarboltakylfu og sló hann í höfuðið með henni. Hann var fluttur á sjúkrahús og var á batavegi eftir aðgerð en Dagur-Tíminn sagði fórnarlambið hafi verið alvarlega slasað á heila. Í umfjölluninni er sagt frá því að það sé rangt hjá öðrum fjölmiðlum að móður fórnarlambsins hafi borist morðhótanir gagnvart syni hennar.
„Þessi drengur hefur aldrei hringt eitt né neitt með neinar hótanir. Það er ekkert í rannsókn málsins sem bendir til þess og við útilokum það algjörlega,“ sagði sýslumaðurinn á Sauðárkróki, Ríkarður Másson, við Dag-Tímann. Ríkarður sagði einnig að árásaraðilinn hefði ekki komið áður við sögu lögreglu og árásin hafi ekki verið fyrir fram skipulögð.
„Það hefur verið einhver ágreiningur milli unglinga á Hvammstanga og Sauðárkróki og þetta virðist bein afleiðing af því. Yfirleitt eru hnefarnir látnir duga en ekki notast við vopn.“
„Ég skil ekki hvernig móðir hans hefur verið dregin inn í þetta. Það hefur aldrei neinn hringt í hana eða mig og hótað drengnum. Ég útiloka þó ekki að fyrri væringar hafi verið á milli piltanna tveggja,“ sagði Kjartan Björnsson, fósturfaðir fórnarlambsins, um málið.