Sjálfstæðismenn eru með böggum hildar vegna velgengni Samfylkingar í skoðanakönnunum. Stormsveit flokksins sem gjarnan er kennd við skrímsli hefur fundið þann eina höggstað á Samfylkingu að Dagur B. Eggertsson frambjóðandi sé siðlaust fól. Mogginn hefur lengi haft horn í síðu Dags og kallað hann orlofssugu fyrir að hafa farið að fordæmi Davíðs Oddssonar, forvera síns á borgarstjórastóli, og safnað upp orlofsdögum í áranna rás.
Kristrún Frostadóttir, formaður Samfylkingar, hefur ráðlagt kjósendum að strika yfir frambjóðendur fremur en að snúa baki við flokknum. Hún sagði í einkaskilaboðum að Dagur væri aukaleikari en ekki ráðherraefni. Sjálfur hefur frambjóðandinn grínast með hlutverk sitt og yfirstrikanir. Hann lagði til í athugasemd á Facebook að sjálfstæðismenn tækju sig saman um að strika sig út. Skrímsladeild Sjálfstæðisflokksins ofbýður hvernig frambjóðandinn hagar sér og telur Dag hafa brotið lög og að ákæra kunni að bíða handan við hornið.
Andrés Magnússon, yfirmaður minningargreina Moggans, skrifar um málið frétt þar sem hann bendir á það hve slóttugur Dagur er og að hann sé að leggja til skemmdarverk í kosningum þar sem kjósandi ógildi kjörseðil með því að strika út einhvern af lista sem hann ekki kýs. Andrés eyðir nokkru púðri í að benda á lagagreinar sem banni slíka eyðileggingarstarfsemi og ýjar að þeim möguleika að Dagur verði dæmdur í fangelsi.
„Kjósandi má aðeins breyta þeim lista sem hann kýs. Samkvæmt 136. grein kosningalaga eru villandi kosningaupplýsingar sakamál og varða sektum,“ skrifar Andrés með grátstafinn í lyklaborðinu.
Hann bætir svo enn betur í glæpinn og segir athugasemd Dags jafnvel vera brot á 103. grein hegningarlaga sem segir að verði maður valdur að því með sviksamlegum hætti að atkvæði annars manns ónýtist þá varði það fangelsi allt að tveimur árum. Skrímsladeildin hefur borið málið undir lögmenn sem telja þetta vera alvörumál og sekt væri sjálfgefin ef til kæru komi.
Sjálfstæðisflokkurinn hefur í fylgishruni sínu verið að mælast með allt að 12 prósenta fylgi og dagljóst að flokkurinn verður að halda fast utan um hvert atkvæði og tryggja að ekkert fari til spillis á laugardaginn þegar kjósendur munda stílvopnin …