Bragi Valdimar Skúlason lætur auglýsendur heyra það í nýrri Facebook-færslu.
Baggalúturinn, sjónvarpsmaðurinn og íslenskusjéníið Bragi Valdimar Skúlason lætur aldeilis gamminn geisa í nýrri Facebook færslu þar sem hann agnúast út í enskuslettur í auglýsingum fyrir komandi biksvartan föstudag og þakkagjörðarhátíðina. Fyrr í mánuðinum hafði hann einnig gagnrýnt „singles day“ markaðssetninguna harðlega.
Sjá einnig: Bragi Valdimar ósáttur: „Megið troða „singles day“ þéttingsfast upp í greiðslugáttirnar á ykkur“
„Góðu góssmangarar og glingurprangarar. Ég veit að ég var agnarpínu leiðinlegur við ykkur um daginn þegar einhleypingadellan ykkar tröllreið hér öllu í posaraufarnar. Jafnvel svo að ég ætlaði að halda aftur að mér þó einhverjir söluglaðir vinir og vinkonur rugluðust örlítið á föstudeginum svarta og slepptu fáeinum blakkfrædeyjum lausum í stífluð niðurföll meðalkaupmennskunnar.“ Þannig hefst færsla Braga Valdimars sem vakið hefur verðskuldaða athygli frá því að hún birtist í gærkvöldi en færslunni hefur verið deilt yfir 170 sinnum og á átta hundrað manns hefur líkað við hana.
Baggalúturinn orðheppni snýr því næst orðum sínum að þakkargjörðarhátíðinni sem auglýsendur sumir hafa dirfst til að kalla thanksgiving. Gefum Braga Valdimar orðið:
„En… að þið skulið svo í blekföstuæðinu miðju afhöfða skömmina endanlega og fimbulfrussast til að tala um „thanksgiving“–veislur eins og ekkert sé sjálfsagðara er algerlega ofar mínum takmarkaða málskilningi. Að þið skulið ekki einu sinni nenna að klína hinu ágæta orði „þakkargjörð“ inn í ykkar kámugu sölupésa og síbyljandi trylliboð ber vott um svo átakanlegt metnaðarleysi að ég efast hreinlega um að þið séuð með markaðslegri meðvitund. Þið megið því gjarnan hysja upp um ykkur ígerð nærhöldin og allravinsamlegast taka þessa ítroðnu oföldu hænsnfugla ykkar ásamt mauksoðnu meðlætinu og éta þar sem úti frýs.“