Í yfirlýsingu sem Halla Tómasdóttir forseti sendi frá sér rétt í þessu óskar hún Þorgerði Katrínu Gunnarsdóttur, Ingu Sæland og Kristrúnu Frostadóttur góðs gengis í viðræðum sínum en Kristrún fer með umboð til stjórnarmyndunar. Þá segir forsetinn einnig að hún muni fylgjast með þróun mála.
Hægt er að lesa yfirlýsingu forsetans hér fyrir neðan:
Í gær átti ég fundi með forystufólki þeirra stjórnmálaflokka, sem eiga fulltrúa á Alþingi, þar sem ræddir voru helstu kostir í stöðunni í kjölfar nýafstaðinna kosninga. Í ljósi þess sem fram kom í þeim viðræðum, og á grundvelli kosningaúrslita, boðaði ég formann Samfylkingarinnar aftur á minn fund í dag.
Eftir samtal okkar á þeim fundi hef ég falið Kristrúnu Frostadóttur umboð til stjórnarmyndunar. Kristrún hefur tjáð mér að hún hafi nú þegar átt samtöl við formenn annarra flokka sem einnig hafa upplýst mig um að þeir séu reiðubúnir til formlegra viðræðna um myndun nýrrar ríkisstjórnar með Samfylkingunni.
Ég óska fulltrúum stjórnmálaflokkanna góðs gengis í þeim viðræðum og mun fylgjast áfram með þróun mála.