Einar Þorsteinsson borgarstjóri afhenti í síðustu viku viðurkenningar fyrir bestu jólaskreytingar rekstraraðila í miðborginni í ár samkvæmt tilkynningu frá Reykjavíkurborg. Fálkahúsið hlaut viðurkenningu fyrir fallegustu jólaskreytinguna en verslunin Kokka þótti skarta fegursta jólaglugganum.
„Viðurkenningunni er ætlað að hvetja rekstraraðila til að skreyta hjá sér því Reykjavík er jólaborgin og skreytingar skipta miklu máli í því að skapa fallega, hlýlega og jólalega ásýnd í miðborginni.“
Veitingastaðirnir Sæta svínið, Fjallkonan og Tipsy eru allir staðsettir í húsinu og þykja skreytingar hússins sérstaklega glæsilegar þetta árið. „Stílhrein lýsingin dregur fram alla helstu drætti þessa fallega húss sem mun meðal annars ýta undir athygli vegfarenda á sögu og arkitektúr Kvosarinnar ásamt því að færa þeim jólin í hjarta,“ segir í umsögn dómnefndar um Fálkahúsið.
„Þetta er mikil hvatning til að halda áfram að skreyta og gera fallegt í borginni okkar. Við hvetjum önnur fyrirtæki til að gera slíkt hið sama,“ sagði Bergdís Örlygsdóttir, markaðsstjóri Fálkahússins, um verðlaunin. „Við þökkum kærlega fyrir okkur.“
Þá þótti verslunin Kokka við Laugaveg 47 eiga fallegasta jólagluggann að þessu sinni.
