Egill Helgason ætlar að hætta að halda með Liverpool í ensku úrvaldsdeildinni í knattspyrnu, ef Elon Musk kaupir liðið.
Eins og svo fjölmargir góðir Íslendingar, er Egill Helgason fjölmiðlamaður forfallinn Liverpool-aðdáandi en liðið virðist nær óstöðvandi í augnablikinu. Segir Egill í raun fáránlegt að hann skyldi halda með liðinu frá Bítlaborginni.
Hefst Facebook-færsla Egils á eftirfarandi hátt: „Af einhverjum ástæðum eyði ég of miklum tíma í að hugsa um stöðuna í enska fótboltanum. Ég held með Liverpool. Það er eiginlega fáránlegt. Lið af þessu tagi eru í eigu auðmanna, þetta eru fyrirtæki, leikmennirnir sumir þéna meira á mánuði en við gerum flest á heilli ævi. Þeir eru málaliðar, ganga kaupum og sölum fyrir himinháar fjárhæðir – tryggð þeirra gagnvart félögunum er ekkert sérstök. Auralitlir áhangendurnir fara hins vegar sjaldnast neitt.“
Segist Egill því næst hafa byrjað að halda með Liverpool ungur að aldri og veltir upp mögulegum ástæðum fyrir því en hann segist ekki ráða við aðdáun sína.
„Ég fór að fylgjast með þessu og halda með Liverpool á ungum aldri. Kannski af því félagið var frá Bítlaborginni eða vegna þess að það spilaði Evrópuleik gegn KR nánast í árdaga boltans. Það voru dálítið aðrir tímar. En enn ræð ég ekki alveg við þetta – ég kætist þegar Liverpool vinnur, finnst leiðinlegt þegar liðið tapar, þótt ég vildi í raun að mér væri alveg sama. Mér finnst þetta heldur ekkert sérlega gaman.“
Að lokum segist Egill vera kominn með lausn á þessari Liverpool-fíkn sinni:
„En nú er komin lausn á þessu. Ef Elon Musk kaupir Liverpool get ég hætt þessu. Ég verð laus – alveg samstundis.“