Flugvélar rákust saman í Mosfellsbæ: „Hending að við skulum vera alveg bráðlifandi“

Litlu mátti muna að verr færi árið 1998 í flugslysi í Mosfellsbæ en DV sagði frá atvikinu.

Tvær flugvélar rákust saman þegar þær voru í aðflugi fyrir lendingu á flugvellinum á Tungubökkum í Mosfellsbæ. Flugvélarnar, TF-KLM og TF-TWO sem báðar voru af gerðinni Cessna. KLM kom ofan að og snerti þak TWO og lenti hjólabúnaður KLM í framrúðu TWO með þeim afleiðingum að hún brotnaði og rigndi glerbrotum fyrir Björn Guðmundsson flugmann meðan vélin var á yfir 100 kílómetra hraða.

Samkvæmt DV skemmdist vélin TWO þónokkuð en auk þess að framrúða brotnaði, skemmdist vængurinn og flapsarnir. „Það er náttúrlega algjör hending að við skulum vera alveg bráðlifandi og alveg ómeiddir. Það hefði ekki mátt muna miklu frá þessu að við bara færum,“ sagði Bjöm við DV.

Blaðið hafði samband við Skúla Jón Sigurðarson, formann rannsóknarnefndar flugslysa, og hann sagði aldrei hafa heyrt að slíku slysi á Íslandi. Báðir flugmenn væru mjög vanir aðstæðunum á flugvellinum og voru á réttri tíðni. Þá væri málið í rannsókn og mikið lán að ekki hafi farið verr.