Uppnám varð í fjölbýlishúsi þar sem maður var með óspektir. Óróaseggurinn var gestkomandi og hafði komist í annarlegt ástand. Lögreglan mætti og fjarlægði manninn. Eftir viðkomu á lögreglustöð var það mat lögreglu að ekki væri hægt að sleppa honum aftur út fyrr en runnin væri af honum víman. Hann vistaður í fangaklefa vegna ástands.
Tveir ökumenn voru stöðvaðir í akstri, grunaðir um akstur undir áhrifum ávana- og fíkniefna eða áfengis. Þeir voru látnir lausir eftir að dregið var úr þeim blóð og tekin skýrsla.
Kópavogslögregla var kölluð til vegna þjófnaðar í verslun. Mál búðarþjófsins var leyst á vettvangi.
Ökumaður stöðvaður í akstri grunaður um akstur undir áhrifum ávana- og fíkniefna. Sá var einnig sviptur ökuréttindum. Laus eftir sýnatöku.
Lögregla kölluð til vegna slagsmála þar sem tveir menn höfðu tekist á eftir ágreining. Slagsmálahundarnir vildu ekki að lögregla blandaði sér í málin og afþökkuðu inngrip laganna varða.