Eldfjalla- og náttúruváhópur Suðurlands á Facebook segja að nú sé staðan þannig við Svartsengi að beðið sé eftir eldgosi.
Í færslu hjá hópnum segir: „Staðan við Svartsengi er nú í raun þannig að beðið er eftir eldgosi. Frá lokum síðasta eldgoss hefur því verið spáð að líkur á öðru eldgosi myndu vaxa verulega í kringum mánaðamót janúar/febrúar.“
Með færslunni birtir hópurinn mynd frá Veðurstofu Íslands þar sem sjá má núverandi stöðu í kvikusöfnun undir Svartsengi en kvikumagnið er áætlað í kringum 35 milljónir rúmmetra, sem er svipað og safnaðist fyrir eldgosið í maí.
Mynd: Veðurstofa Íslands
Að lokum segir í færslunni að það þurfi þó talsvert meira af kviku að safnast upp til þess að það jafnist á við síðustu tvö eldgos:
„Nokkuð meira þurfti þó til áður en síðustu tvö eldgos urðu, eða 38-40 milljónir. Um 40 milljónir rúmmetra söfnuðust undir Svartsengi í aðdraganda eldgossins í ágúst, sem reyndist síðan stærsta eldgosið hingað til.“
Fólkið á bakvið Facebookhópnum eru sérfræðingar í jarðvísindum, þeir Daníel Freyr Jónsson, jarðfræðingur (M.Sc.), Einar Sindri Ólafsson, jarðfræðingur (M.Sc.), Ragnar Sigurðarson, jarðfræðingur (B.Sc.) og Stefán Á. Þórðarson, jarðfræðingur (B.Sc.).