Meira og meira verða Íslendingar varir við veðmálastarfsemi á Íslandi en fyrirtæki í bransanum hafa á undanförnum árum sett aukið fé í að kynna starfsemi sína, sem er í mörgum tilfellum ólögleg á Íslandi.
Ísland er þó ekki eina landið sem stendur í þessum sporum en opnað hefur verið fyrir aukna veðmálastarfsemi í mörgum löndum á sama tíma. Ekki eru allir sáttir við þessa þróun og hafa rannsóknir sýnt fram á aukna veðmálafíkn og þá sérstaklega meðal ungra karlmanna. Mannlíf hafði samband við KSÍ til að spyrjast fyrir um hvernig sambandið liti á veðmálastarfsemi og fylgifiska þess en langstærstur hluti veðmála í Evrópu tengist knattspyrnu með einum eða öðrum hætti.
„Veðmálafíkn er fyrst og fremst samfélagslegt vandamál, sem a.m.k. íþróttahreyfingin er meðvituð um, og miðað við þær upplýsingar sem liggja fyrir þá eru ungir karlmenn stór hluti þess hóps sem stundar veðmál,“ sagði Eysteinn Pétur Lárusson, framkvæmdastjóri KSÍ, við Mannlíf um málið.
Vitundarvakning
Þorkell Máni Pétursson, stjórnarmaður KSÍ, talaði fyrir því áður en hann var kosinn í stjórn sambandsins á síðasta ársþingi að hjálpa þyrfti leikmönnum og þjálfurum sem eiga við veðmálavandamál að stríða.
Hvernig er staðan á því í dag?
„KSÍ vinnur t.a.m. að verkefni í samstarfi við HSÍ og KKÍ þar sem hvert félag myndi tilnefna sinn heilindafulltrúa. Sá aðili myndi þá halda utan um almenna fræðslu til félagsmanna um veðmál og veðmálafíkn (fræðsluefni kæmi frá ýmsum aðilum, t.d. sérsamböndunum eða regnhlífarsamböndum þeirra) og vera tengiliður fyrir þá einstaklinga sem vilja vita meira eða vilja vita hvert þeir geti leitað telji þeir sig þurfa á hjálp að halda. Einnig er á teikniborðinu samfélagslegt verkefni (forvarnaverkefni) sem snýr að vitundarvakningu um veðmálafíkn, sem gæti komið til framkvæmda á þessu ári eða því næsta.“
Nokkur tilfelli hafa komið upp þar sem leikmenn á Íslandi hafa verið dæmdir í bann fyrir að veðja á leiki. Þekktasta nafnið er án efa Steinþór Freyr Þorsteinsson sem var dæmdur í bann árið 2023 en hann spilaði á sínum tíma átta landsleiki fyrir Ísland og var atvinnumaður í nokkur ár. Sama ár var Sigurður Gísli Snorrason einnig dæmdur í bann fyrir að veðja á leiki. Steinþór og Sigurður veðjuðu báðir á leiki hjá þeim liðum sem þeir voru að spila fyrir.
„KSÍ er með sína ferla varðandi mál sem kunna að koma upp og þau mál fara bara sína eðlilegu leið innan okkar kerfis. Mót og leikir á vegum KSÍ eru með virka vöktun og KSÍ fær fyrirspurnir og/eða ábendingar og eftir atvikum skýrslur frá vöktunaraðilum þegar við á. Það hafa komið upp tilvik hér á landi þar sem reglur hafa verið brotnar og þá eru ferlar virkjaðir, eins og vera ber.“