Öryggisvörður á Taco Bell í Los Angeles fékk sig fullsaddan af viðskiptavini sem hlýddi ekki fyrirmælum hans. Viðskiptavinurinn, kona á fertugsaldri, hunsaði beiðni hans um að yfirgefa staðinn og fór þess í stað að sjálfsafgreiðslubás til að panta mat.
Við þetta sætti öryggisvörður sig ekki og gekk að konunni og sló hana með flötum lófa í andlitið af miklum krafti. Konan, sem átti ekki von á högginu, var greinilega í uppnámi eftir atvikið en neitaði samt sem áður að fara af staðnum. Á endanum náði öryggisvörðurinn að koma henni út. Atvikið náðist á myndband og var það annar viðskiptavinur sem tók það upp.
„Hann sló hana sjúklega fast. Þetta var ruglað. Allir voru í uppnámi,“ sagði Alejandro Sanchez í viðtali við fjölmiðla en hann tók upp myndbandið. Hann sagði að starfsmenn staðarins hefðu haft meiri áhyggjur af upptöku hans frekar en konunni sem var slegin.
Taco Bell hefur ekki viljað tjá sig um málið að svo stöddu.