Það er margt hægt að segja um Stefán Einar Stefánsson, fjölmiðlamann Morgunblaðsins, en hann hefur fengið mikla athygli á undanförnum mánuðum fyrir þáttinn Spursmál sem er sýndur á vefsíðu Morgunblaðsins. Sitt sýnist hverjum um gæði þáttarins en greinilegt er að hann hefur vakið lukku hjá mörgum hægri mönnum á landinu.
Ábyrgð Stefáns er mikil enda er trúverðugleiki fjölmiðlamanna gífurlega mikilvægur, sérstaklega hjá jafn virtu blaði og Morgunblaðið segist vera. Því er í raun óskiljanlegt að Stefán haldi því ítrekað fram að íslensk stjórnvöld séu að fjármagna hryðjuverkasamtökin Hamas. Rétt er að taka fram að íslensk stjórnvöld hafa þvertekið fyrir að þetta sé rétt hjá Stefáni. Í samskiptum sem fóru fram á samfélagsmiðlum bað Björn Leví Gunnarsson, fyrrum þingmaður Pírata, um heimildir fyrir þessum fullyrðingum.
Stefán birti í kjölfarið hlekk á síðu hjá samtökum sem eru þekkt fyrir að gera lítið úr mannréttindabrotum í Kína, Rússlandi, Darfúr og Venesúela svo dæmi séu nefnd og eru þau alræmd fyrir að taka stöðu með Ísrael í öllum myrkraverkum þeirra. Mögulega ætti siðfræðingurinn að hugsa sig tvisvar um áður en hann dreifir þessari samsæriskenningu aftur …