Leikarinn og grínistinn Hjálmar Örn Jóhannsson greindi frá því í færslu á Facebook að hann hefði fengið hjartaáfall heima hjá sér í gær. Birti hann mynd af sjálfum sér í sjúkrarúmi með færslunni.
„Skjótt skipast veður í lofti!
Klukkan 14:40 á laugardaginn fékk ég hjartaáfall heima hjá mér!
Skömmu síðar var ég kominn uppá spítala og í góðar hendur en ég leit einmitt þá á klukkuna og var hún 15:00 og þá hugsaði ég, ekta ég að deyja þegar enski boltinn er að byrja.
Ég var svo sendur í þræðingu og kl. 18:50 var búið að fóðra æðarnar! Magnað heilbrigiðskerfi og starfsfólk sem gerði þetta allt á stuttum tíma!
Ég er allur að koma til og þakka öllu starfsfólki heilbrigðiskerfisins á Íslandi fyrir gríðarlega fagmennsku og kærleik!“ skrifaði Hjálmar um upplifun sína.
Hjálmar Örn hefur undanfarin áratug verið einn vinsælasti grínisti landsins eftir að hann leyfði fólki að fylgjast með sér á samfélagsmiðlinum Snapchat en hann starfaði á leikskólanum Múlaborg þegar hann hóf þá vegferð. Síðan þá hefur hann einnig hafið leiklistarferil en hann lék í myndinni Fullir Vasar árið 2018 og svo í þáttunum Útilega sem komu út í fyrra.
