„Hámarkið í dag gæti náð 20 stigum einhverstaðar inn í sveitunum og svo á morgun er verið að spá yfir 20 stiga hita á Suður- og Suðvesturlandi,” segir Haraldur Eiríksson, veðurfræðingur hjá Veðurstofu Íslands. Þá segir hann rigningu ekki vera í kortunum. „það er sólríkt og hlýtt í dag og á morgun líka víða um land.”
„Það er búið að vera hæðarsvæði yfir landinu og engar lægðir verið að hrella okkur núna undanfarna daga og vikur. Gæti farið í 23-24°C þar sem verður hlýjast,” segir Haraldur og bætir við að það sé þó ekki bara af hinu góða. Þá er orðinn dálítið alvarlegur þurrkur víða á Suður- og Vesturlandi „Sólin er bara að baka landið.”
„Það hefur, það sem af er af mánuðinum, varla dregið ský fyrir sólu. Til dæmis hérna í Reykjavík,” segir hann. Þó megi búast við köflóttara veðri og aðeins meira af skýjum.
„Það er þurrkur á öllu landinu í dag, en annað kvöld er útlit fyrir rigningu Norðaustanlands.” Þá megi búast við rigningu fram á fimmtudagsmorgun á Norðaustur- og Austurlandi. „Svo verður einhver væta austantil á landinu út vikuna. Með töluvert svalara veðri þar.” Haraldur segir þetta vera alveg öfugt við það sem var í fyrra. „Sérstaklega í júní, þá var svo hlýtt á Norðaustur- og Austurlandi. Búið að snúast algjörlega við.” Langbesta veðrið verður því á Suður- og Vesturlandi út vikuna.