„Það verða alltaf til stjórnmálamenn sem vilja notfæra óttann og búa þannig til ímyndaðan óvin til að beina óttanum sem þeir hafa skapað í einhvern farveg.” Þetta sagði Áslaug Arna Sigurbjörnsdóttir, þingkona Sjálfstæðisflokksins, í eldhúsumræðum á Alþingi.
Hún nefndi að orð skiptu máli, hvernig við veljum og notum þau. „Í heilbrigðu umhverfi ætti að þá fara fram gagnrýnin, yfirveguð og staðreyndamiðuð umræða” sagði Áslaug og bætti við: „Sagan kennir okkur hins vegar að það er í umhverfi efasemda sem minni spámenn sjá sér leik á borði og breyta efasemdum í ótta.”
Með ræðunni gagnrýndi hún efasemdir stjórnarandstöðunnar á ríkisstjórninni. Þá sakaði hún flokka um að vera vandamálið. „Jaðarflokkar eru alltaf með einfaldar lausnir á vandamálum sem þeir hafa sjálfir búið til.” sagði Áslaug.
„Þeir vita sem er að þegar fólk er óttaslegið þá er auðveldara að stíga á bremsuna og taka óskynsamlegar ákvarðanir. „Þegar alið er á ótta er málefnaleg umræða sett í gapastokkinn og við tekur eðlishvötin, og eðlishvötin segir okkur að breytingar séu hættulegar.”