Víðir Reynisson, yfirlögregluþjónn hjá Ríkislögreglustjóra, hefur unnið hug og hjörtu þjóðarinnar sem einn af þríeyki Almannavarna.
Víðir, Alma Möller landlæknir og Þórólfur Guðnason sóttvarnalæknir hafa áminnt þjóðina um reglur og háttsemi í kórónuveirufaraldrinum og staðið sig að langflestra mati með góðum hætti.
Og nú er lag fyrir þá sem vilja hitta Víði daglega að sækja um vinnu honum við hlið.
„Langar þig ekki að vinna með mögnuðu teymi? Hefur þú gaman að áskorunum og óvæntum uppákomum? Vilt þú nokkuð vinna í of fyrirsjánlegu umhverfi? Þá ættir þú að kíkja á þetta,“ segir Víðir á Facebook-síðu og deilir auglýsingu um laust starf verkefnastjóra hjá Ríkislögreglustjóra.
Helstu verkefni verkefnastjóra eru:
• Umsjón með gerð áhættumats á vegum almannavarna.
• Stýring verkefna um könnun áfallaþols.
• Samskipti og ráðgjöf vegna almannavarna.
• Þátttaka í rannsóknarverkefnum.
• Vinna í Samhæfingar- og stjórnstöð ríkislögreglustjóra.
• Önnur verkefni skv. nánari ákvörðun næsta yfirmanns.
Verkefnastjóri þarf að uppfylla nokkur skilyrði sem nánar má lesa um í auglýsingu, en umsóknarfrestur er til 1. ágúst.