„Yfirleitt leiði ég þetta hjá mér en stundum verður þetta stjórnlaust eins og um helgina og það hefur auðvitað áhrif. Það var gróflega ráðist að persónu minni, útliti, fötlun og holdafari og þegar það er svona stór hópur fólks sem leggur sig fram um að áreita mig og níða þá hefur það áhrif á öryggistilfinningu mína. Ef þú ert tilbúinn til að tala um mig af svona mikilli heift hvað gerist þá ef ég mæti þér úti á götu? Þetta er ekki bara hegðun sem á sér stað einungis á netinu þó fólk vilji halda það.“
Þetta segir Tara Margrét Vilhjálmsdóttir, formaður Samtaka um líkamsvirðingu. Gagnrýni sem Tara setti fram á Twitter í tengslum við forsíðuviðtal DV við Auðunn Blöndal um síðustu helgi olli fjaðrafoki þegar Hringbraut sló henni upp sem frétt á vef sínum undir fyrirsögninni Tara brjáluð yfir helgarviðtali DV við Audda Blö. Í kjölfarið fékk Tara yfir sig holskeflu fúkyrða á samfélagsmiðlum þar sem sett var út á útlit hennar, fötlun og holdafar.
Í sérstöku helgarviðtali Vikunnar sem birtist á morgun á man.is ræðir Tara æsifréttamennsku fjölmiðla, nauðgunarmenningu, ofbeldið sem feitar konur verða fyrir og áreitið sem hún hefur mátt þola eftir að hún fór að berjast opinberlega gegn fordómum og mismunun á grundvelli holdafars í samfélaginu.
Mynd / Hallur Karlsson
Förðun / Elín Hanna förðunarfræðingur Urban Decay