Kirkjuþing tók af skarið og samþykkti að biðjast afsökunar á frægri Jesúmynd þar sem sett höfðu verið brjóst á Jesú Krist. Með þessu er kirkjuþing að snupra Agnesi Sigurðardóttur biskup og Pétur Markan upplýsingafulltrúa Þjóðkirkjunnar. Brjóstamyndin af Jesú er horfin af vef Þjóðkirkjunnar og auglýsingar afturkallaðar.
Fjöldi presta hafði lýst furðu sinni og hneykslan á því sem kallað var afskræming á frelsaranum. Séra Geir Waage, einn helsti áhrifamaður í prestastétt, lýsti afdráttarlausri afstöðu sinni vegna málsins og fordæmdi útfærsluna. Pétur Markan, upplýsingastjóri Þjóðkirkjunnar, varði auglýsingaherferferðina af festu rétt eins og Agnes biskup. Þeim varð þó ljóst þegar Kirkjuþing kom saman að andstaðan væri of mikil og að orrustan um brjóts Krists væri töpuð.
„Kirkjuþingi 2020 þykir afar miður að jesúmynd í auglýsingu um sunnudagaskóla kirkjunnar hafi sært fólk. Ætlunin var sú að undirstrika fjölbreytileikann en hvorki að særa fólk né ofbjóða,“ segir í ályktun þingsins og auglýsingin hefur verið tekin úr umferð og Kristur sviptur nýfengnum brjóstum.
Málið er Agnesi biskupi erfitt og eflir andstæðinga hennar. Rætt er um að svokallaðir Svartstakkar innan prestastéttarinnar rísi nú upp tvíefldir. Agnes hefur þótt harðskeytt sem biskup og sumpart miskunnarlaus í starfsmannamálum. Nýlegt mál séra Skírnis Garðarssonar er dæmi um slíkt. Skírnir var rekinn án áminningar fyrir þær sakir að hafa rætt opinberlega um mál bakvarðarins sem þóttist vera með réttindi sem sjúkraliði og var kallaður til starfa í Bolungarvík til að sinna Covidsjúklingum og öldruðum. Áður hafði bhöfðu starfsmenn biskupsstofu og Lágafelssóknar brotist inn í tölvupósta séra Skírnis og framsent þá. Í framhaldinu var Skírni gert að hætta í Lágafellssókn og verað héraðsprestur á Suðurlandi. Skírnir hefur boðað skaðabótamál á á Þjóðkirkjuna vegna brottrekstursins þar sem hárra bóta er krafist.
Ég var búin að fá algjörlega nóg eftir samskipti mín við biskup
Fleiri starfsmenn kirkjunnar hafa hrakist úr starfi. Þar má nefna Ellisif Tinnu Víðisdóttur, sem hraktist úr starfi sem framkvæmdastjóri Kirkjuráðs.
„Ég var búin að fá algjörlega nóg eftir samskipti mín við biskup og sagði mig úr þjóðkirkjunni nýverið,“ sagði Ellisif Tinna í samtalið við Stundina árið 2016. Ellisif Tinna hætti störfum eftir að hafa aðeins verið um eitt og hálft ár hjá þjóðkirkjunni. Biskupinn stóð í miðri þeirri deilu og þurfti aðstoð sálfræðinga. Biskupsmenn rufu samkomulag sem gert hafði verið um aðkomu sálfræðinga að deilunni. Þá var lekið frá Biskupsstofu fölskum upplýsingum um himinhá laun framkvæmdastjórann, sem Pressan, vefísða Björns Inga Hrafnssonar, birti. Lekinn virtist vera til að sverta framkvæmdastjórann fyrrverandi. Seinna og í allt öðru samhengi lýsti biskupinn því í fjölmiðlum að ekki ætti að nota illa fengnar upplýsingar sem fréttaefni, þótt sannnar væru. Með þessu þótti biskupinn taka afstöðu gegn uppljóstrurum sem meðal annars höfðu orðið til þess að komið var upp um kynferðislegt áreiti presta.
hreintrúarmönnum innan kirkjunnar vex ásmegin
Óljóst er hver staða Agnesar biskups er eftir uppákomuna með Jesú Krist. Víst er þó að hreintrúarmönnum innan kirkjunnar vex ásmegin og biskupsmenn veikjast. Svartstakkarnir sem voru hvað öflugastir fyrir aldamót gætu náð vopnum sínum aftur og siðvætt yfirstjórn Þjóðkirkjunnar og fært starfið í fyrra horf bókstarfstrúar og íhaldssemi. Víst er að átökunum í kringum Agnesi biskup er ekki lokið.