Björn Inga Hrafnssyni, blaðamanni og óneitanlega helsta áhugamann Íslands um COVID, líst ekki á blikuna. Hann gefur sterklega í skyn að enduropnun líkamsræktarstöðva geti haft skelfileg áhrif á þróun mála næstu vikur. Færsla hans á Facebook um þetta hefur fengið mikil viðbrögð á stuttum tíma og ljóst að margir eru sammála honum.
Björn Ingi fullyrðir að það sé skrifstofufólk í heilbrigðisráðuneytinu sem hafi ákveðið þetta í fjarveru ráðherra og gegn vilja sóttvarnarlæknis. Svandís Svavarsdóttir var frá störfum síðustu tvær vikur vegna veikinda í fjölskyldu hennar.
„Það er komin upp stórmerkileg staða í varnarbaráttu okkar sem samfélags gegn veirunni. Sóttvarnalæknir telur sérstaklega varasamt við þessar aðstæður að opna líkamsræktarstöðvar. Hann segir að smit innan veggja þeirra hafi verið ein helsta uppistaðan í þeirri bylgju sem við höfum verið að kljást við undanfarnar vikur og sér ekki fyrir endann á,“ segir Björn Ingi.
Björn Ingi kallar eftir því að þessir embættismenn mæti á fundinn síðar í dag. „En nú ber svo við að skrifstofufólk í heilbrigðisráðuneytinu (á ábyrgð heilbrigðisráðherra) er ekki sammála honum og ætlar víst að leyfa opnun líkamsræktarstöðvanna í dag. Er ekki þá rétt að þetta sama skrifstofufólk mæti á næstu upplýsingafundi og fari yfir með okkur hvernig það vill tækla næstu skref?,“ spyr hann.
Fjöldi þjóðþekktra manna hafa skrifað athugasemd og eru flestir á því máli að þetta sé galið. Pawel Bartoszek í Viðreisn skrifar til að mynda: „Ég myndi telja það vera rétt. Nema ekki skrifstofufólk heldur ráðherrar. Að saman skapi: ef sóttvarnaryfirvöld geta telja sig ekki geta sannfært ráðherra um ágæti eigin raka þá veit ég ekki hvað mér finnst um að þau reyni að sannfæra almenning um þau, fram hjá stjórnartíðindum.“
Símon Birgison, fyrrverandi blaðamaður og nú starfsmaður í grunnskóla, skrifar svo: „Í grunnskólanum þar sem ég vinn máttu nemendur í morgun ekki vera í íþróttum innandyra og voru því úti í frostinu. En á sama tima máttu foreldrar þeirra fara í spinning og hóptima í ræktina. Pínu skrýtið finnst þanni þar sem smithættan er mun minni hja börnum.“
Ein kona spyr svo: „Gæti verið að þetta snúist um kostnað við lokunarstyrki?“