Það féll í skaut starfsmanns Landspítalans að rannsaka alvarlegt Covid-hópsmit sem upp kom á Landakoti. Smitið hefur þegar kostað tug mannslífa. Niðurstaðan verður kynnt opinberlega á föstudaginn.
Már Kristjánsson, yfirlæknir smitsjúkdómalækninga Landspítala, staðfesti að það sé starfsmaður spítalans sem sinni rannsókninni. Það gerði hann sem gestur Morgunvaktarinnar á Rás 1 í morgun. Hann sagði þar að viðkomandi starfsmaður hafi hvergi nærri komið málinu og að niðurstaðan verði á endanum borin undir svokallaðan ytri skoðunaraðila sem í þessu tilviki séu starfsmenn hjá rakningarteymi almannavarna.
[pt_view id=“f140352oic“]
Sú skelfilega staða kom upp að tugir aldraðra á Landakoti og tengdum stofnunum smitaðist af Covid 19. Nú blasir við að 15 prósent þeirra létu lífið vegna þess að veiran náð að dreifa sér þar sem síst skyldi. Gamalt, varnarlaust fólk varð fyrir högginu og margt þeirra lét lífið. Landakot er á ábyrgð Landsspítalans og þar brást að skipta Landakoti niður í örugg sóttvarnarsvæði. Ástæðan var sögð vera mannekla. Kallað hefur verið eftir lögreglurannsókn á Landakotsmálinu.
Samkvæmt Má er úttekt starfsmannsins svo gott sem tilbúin og nú verði hún borin undir landlækni, sóttvarnarlækni og stjórnendur Landspítala. Í lok vikunnar fær almenningur svo að vita niðurstöðuna. „Þetta er núna að verða ljóst, hver niðurstaðan verður,“ sagði Már í útvarpsviðtalinu og lýsti þar jafnframt yfir að það væri í raun mildi að á Landspítalanum hefðu ekki komið upp fleiri hópsmit en raun ber vitni. Aðspurður um hvað kom fyrir í tilviki Landakotssmitanna vildi Már ekki svara. „Ég get ekki fjallað um það hér,“ sagði Már.