Hildur Eir Bolladóttir, prestur í Akureyrarkirkju, segir að það sé galið að ætla að sækja til saka þann sem kom á stað hópsmiti á Landakoti. Hún segir að enginn starfi þar með gróða í huga. Hún segir á Facebook að á stofnunum sem þessum geti ýmislegt komið upp en starfsfólk reyni ávallt sitt best.
„NEI nei nei við erum ekki að fara þangað, þá er skárra að leyfa bara veirunni að hafa sinn gang án mótspyrnu. Blaðamaður spurði Pál Matthíasson forstjóra Landspítalans hvort gerð yrði lögreglurannsókn á hópsmitinu á Landakoti sem hefur dregið sjúklinga þar til dauða undanfarna daga,“ segir Hildur Eir.
Hún rifjar upp þegar hún kvaddi föður sinn á stofnunni. „Pabbi lést á Landakoti fyrir tólf árum þá rétt rúmlega sjötugur að aldri úr Levy sjúkdómnum eða nei sennilega dó hann úr lungnabólgu ég man það ekki, man bara að í rúminu við hlið hans var maður með Nóróveiru og ég var ófrísk og bað um að þeir yrðu færðir í sitthvort herbergið af því að mig langaði að kveðja pabba án þess að eiga á hættu að fá Nóróveiru og æla barninu út. Úr þessu var leyst og við áttum góða síðustu daga við sjúkrabeð pabba. Þetta heitir lífið, það er fullt af sárum vörðum, pabbi var með alvarlegan undirliggjandi sjúkdóm en dó síðan úr lungnabólgu eða einhverri pest, það var engum að kenna,“ segir Hildur.
Hún segir starfsfólkið hafa gert sitt allra besta. „Starfsfólk Landakots umvafði hann kærleika og umhyggju, það er hugsjón þeirra sem velja þennan illa launaða starfsvettvang, fólk ræður sig ekki á Landakot til að græða peninga, svo mikið er víst. En við förum ekki að sækja fólk til saka vegna smita Covid 19, ef það verður raunin þá er ljóst að afleiðingar smitvarna eru orðnar skaðlegri en veiran.