Sveinn Aðalsteinsson, hagfræðingur og leiðsögumaður, var bráðkvaddur síðastliðinn mánudag. Margir minnast hans á Facebook í dag. Andlát hans var líkt og þruma úr heiðskýru lofti að sögn aðstandenda en hann var bæði hraustur og orkumikill.
Fjölmiðlamaðurinn Egill Helgason minnist hans á Facebook og segir hann að Miðbærinn verði tómlegri án hans. „Elskulegur vinur okkar hjóna, Sveinn Aðalsteinsson, varð bráðkvaddur á mánudaginn. Sveinn var einstakur og margbrotinn maður. Hann hafði brennandi áhuga á þjóðmálum og heimsmálum og samtölin við hann gátu orðið löng þegar maður rakst á hann á götu,“ segir Egill.
Hann segir þá tvo oft hafa verið ósammála í pólitík en það skemmdi þó ekki vináttu þeirra. „Hann var hugsjónamaður, bæði fyrir fólk og fyrir náttúru. Hann var brosmildur og hlýr í fasi, en stundum brá fyrir efasemdasvip ef honum fannst maður fara villur vega. Við vorum alls ekki alltaf sammála um pólitík en milli okkar voru kærleikar og vinátta góð. Við Sigurveig munum sakna þess mikið að hitta Svein ekki framar á förnum vegi í Miðbænum, Skólavörðuholtið verður tómlegra án hans. Við sendum hjartans kveðjur til Sigrúnar, barnanna og fjölskyldunnar,“ segir Egill.
Fjölmargir taka undir með Agli og þar á meðal Dagur B. Eggertsson borgarstjóri. „Vel skrifað og einsog talað útúr mínu hjarta!,“ segir Dagur. Ari Gísli Bragason, framkvæmdastjóri Bókarinnar á Hverfisgötu, er sammála og bætir við: „Samherji og vinur úr miðbæ Reykjavíkur. Áttum nýlega gott samtal í vesturbæjarlaug oftar sem áður….fyrir lokun. Blessuð sé minning hans. Falleg orð Egill.“
Skáldkonan Elísabet Kristín Jökulsdóttir mun hugsa blítt til Sveins. „Hans verður saknað, hann var alltaf svo hliðhollur mér, hann var sjentilmaður,“ segir hún.