Páll Bergþórsson, fyrrverandi veðurstofustjóri, segir áberandi að fullorðið fólk yngra en 50 ára virðist varla geta talað eigin móðurmál. Hann veltir fyrir sér hvað valdi þessu og nefnir sem dæmi hraðlestraprófin. Páll varð 97 ára fyrr á þessu ári svo ljóst er að hann hefur nokkra yfirsýn.
„Það er áberandi hvað fólk á aldrinum 15 -50 ára er illa talandi. Margir spýta út úr sér orðunum með sem allra mestum hraða, og verða því að gera hlé á tali sínu við og við af því að hugsunin hefur ekki við. Þetta er sérstaklega áberandi þegar fulltrúar almennings eru í viðtölum við fjölmiðla,“ segir Páll á Facebook.
Hann segir að það verði ekki seinna vænna að ráða bót á þessu. „Mér hefur dottið í hug að orsökin séu hraðlestrarprófin sem byrjað var á fyrir nokkrum áratugum, þegar lestrarkunnáttu var farið að hraka. Það má ekki seinna vera að farið sé að ráða bót á þessu. Hvað segja íslenskukennarar?,“ spyr Páll.
Einn vinur hans, Ólafur nokkur, svarar því kalli. „Ég er íslenskukennari til fjölda ára – og verð að segja að ég er ósammála því að hraðlestrarprófin séu einhver orsakaþáttur hér. Þau eru tekin ca. þrisvar yfir árið – en þess á milli eru allskonar verkefni og æfingar sem tengjast framsögn og kynningu hverskonar. Þar er lögð áhersla á skýra framsögn og að ekki sé talað of hratt eða lágt. Miklu meiri áhersla lögð á slíkt í skólastarfinu en hraðlestur.“
Páll svarar og spyr: „Hver önnur er þá orsökin?“