Össur Skarphéðinson, fyrrverandi ráðherra, er ævareiður yfir töfum á bóluefnum til landsins og segir að stjórnvöld verði að rífa sig upp af sínum breiða rassi eftir afleita frammistöðu og dæmalaust klúður. Hann skilur einfaldlega ekki hvers vegna við leitum ekki til Kínverja eftir bóluefni.
Samkvæmt heimildum Mannlífs logar allt bakvið tjöldin vegna seinkunnar bóluefnis til landsins. Aulaskapur stjórnvalda sé hvílíkur að tryggja hefði átt aðgengi miklu fyrr og betur. Seinkun bólusetninga þýðir lítið annað en alvarleg seinkun viðspyrnu atvinnulífsins sem kosta mun þjóðarbúið verulega fjármuni. Spjótin beinast að Svandísi Svavarsdóttur heilbrigðisráðherra.
Össur er einn þeirra sem telja asnaskap íslenska stjórnavalda algeran. Það kemur fram í stöðufærslu hans á Facebook. „Upplýsingar yfirvalda, þríeykis og annarra, um bóluefni er varla hægt að kenna við annað en óreiðu. Fyrir skömmu börðu yfirvöld bumbur yfir því að vera búin að semja við Pfizer um bóluefni fyrir alla þjóðina. Þau töluðu um að bólusetning yrði kláruð á fyrsta og öðrum ársfjórðungi 2021. Þau virtust telja að nóg bóluefni yrði til reiðu innan skamms. Heilbrigisyfirvöld í Reykjavík skildu það þannig að þau þyrftu að vera reiðubúin til að bólusetja mikinn fjölda fólks á skömmum tíma. Þau unnu sitt verk af stakri prýði og kynntu áætlun, sem miðaði að því að hægt væri að bólusetja alla Reykvíkinga á örfáum dögum. Sama gilti væntanlega um alla þjóðina,“ segir Össur og heldur áfram:
„Á síðustu dögum hefur hins vegar komið í ljós að mjög mikið mun skorta á að bóluefnið berist í tíma. Nú er talað um að bólusetning verði ekki lokið fyrr en undir lok árs. Fulltrúar kerfisins fóru í flæmingi undan spurningum Björns Inga um bóluefnin á upplýsingafundinum í dag. Skýr svör komu ekki fram. Þar kom hins vegar fram sú ótrúlega staðreynd að þó íslensk stjórnvöld hefðu gert samninga við einstaka lyfjarisa þá hefðu þau EKKI samið um afhendingartíma. Þetta er í reynd ótrúlegt og virkar satt að segja sem dæmalaust klúður. Hverjir gengu svona laust frá samningum og hver ber ábyrgð á því? Vissu ráðherrar ekki af þessu þegar þeir sköpuðu væntingar hjá þjóðinni – m.a. ferðaþjónustunni – um að búið yrði að bólusetja þjóðina á fyrri part árs?“
Össur segir ljóst að sú staða sem nú er uppi varðandi bóluefni komi til með að verða Íslendingum mjög dýr. „Verði bólusetningum ekki lokið fyrr seinni part árs – þvert ofan í væntingar sem stjórnvaldið skapaði – þá þýðir það að enn eitt ferðaþjónustusumar mun glatast. Það mun kosta þjóðarbúið tugi milljarða, hugsanlega hundruð, og líklega líf fjölda fyrirtækja sem hingað til hafa hangið á nöglunum á bjargbrúninni. Séð af Vesturgötunni virkar þetta afsakplega afleit frammistaða hjá heilbrigðisyfirvöldum. Núna er spurningin hins vegar þessi: Hvernig ætla stjórnvöld að bregðast við þessari nýju stöðu? Ætla þau bara að sitja á sínum breiða rassi og sjá hvort þetta reddist af sjálfu sér?,“ spyr Össur.
Ráðherrann fyrrverandi segir ljóst að í alheimsfaraldrinum þurfi íslensk stjórnvöld að slást fyrir bóluefninum til að bjarga íslenskum hagsmunum. „Mjálmið á upplýsingafundinum um að Íslendingar væru svo smáir að betra væri að vera í stóru samfloti virkjar hjákátlega andspænis þeirri staðreynd, að gegnum tengsl við æðstu ráðamenn Kína komu flugvélafarmar þaðan í sumar með grímur og annað sem Íslendinga skorti fyrir heilbrigðisþjónustuna. Gildir eitthvað annað um bóluefni? Afhverju fara stjórnvöld ekki á sömu stúfa og í sumar, og hafa beint samband við kínversk stjórnvöld og fá þaðan bóluefni amk þangað til Pfizer fer að standa við samninga? Er það pólitískur rétttrúnaður a la Trump sem veldur að ekki má leita til Kínverja? Á meðan blæðir ferðaþjónustu og fleiri almennir borgarar munu eiga um sárt að binda en ella,“ segir Össur.