Samfélagsmiðlastjarnan og áhrifavaldurinn, Laufey Ebba Eðvarðsdóttir, fékk yfir sig hrúgu af hatursskilaboðum og ásakanir um dýraníð eftir að hafa birt sjálf myndband á TikTok af sér og hundinum hennar.
Myndbandið fór á flug og rataði bæði inn í fjölmennan hóp dýraeigenda, Hundasamfélagið, og inn í hópinn Nafngreinum og myndbirtum dýraníðinga! á Faceook. Á TikTok hins vegar, hvar Laufey Ebba er einn vinsælasti Íslendingurinn, fékk áhrifavaldurinn fljótlega skammir eftir að myndbandið birtist. „Þið eruð ógeðsleg og ég vona að hundurinn verður tekinn frá þér,“ sagði einn gagnrýnandanna.
Myndbandið er í raun klippa í beinni útsendingu og á henni sést Laufey Ebba láta hundinn sinn detta í gólfið heima hjá sér. Fjölmargir hundaeigendur risu upp á afturlappirnar vegna klippunnar. Hulda nokkur er ein þeirra. Dýraníð. Íslenskur „áhrifavaldur“ hendir hundinum sínum í gólfið,“ segir Hulda.
Inni í hundasamfélaginu kemur Laufey Ebba sjálf inn og útskýrir sína hlið. „Þetta var hvatvísi og mistök. Tveimur sekúndum seinna segir ég „Vó, þetta átti ekki að vera svona fast.“ Ég veit þetta var rosalega heimskulegt og ég skammast mín fyrir þetta. Ég er góð við hundinn minn og hún er það mikilvægasta í mínu lífi,“ segir Laufey.
Ég vil minna á það sem ég hef oft sagt, það er allt miklu betra ef við erum bara næs.
Gréta spyr hins vegar. „Hver gerir svona við það mikilvægasta í lífi sínu?,“ spyr Gréta. Og Jan spyr líka. „Var þetta þetta LÆKANNA virði?“ Margrét nokkur á varla til orð. „Fullorðin manneskja getur ekki stílað þetta á hvatvísi/mistök. Ömurlegt að sjá svona framkomu við dýr,“ segir Margét.
Það er líka margir sem stíga upp Laufey til varnar. Það gerir til að mynda Ásdís María. „Finnst varla hægt að kalla þetta dýraníð, hún færði sig viljandi frá hundinum svo hann datt, ómeiddur. Margir hlæja af klaufaskap í dýrunum sínum. Þó svo mér finnist þetta persónulega ekki fyndið myndband ekki ekki hægt að kalla manneskjuna dýraníðing. Alls konar alvöru dýraníðingar úti sem reyna að meiða dýr. Laufey hefur staðið á bakvið börn sem lenda í neteinelti svo ég stórefast að hún sé að níðast á hundinum sínum,“ segir Ásdís.
Laufey steig svo sjálf fram og útskýrði klippuna í eigin færslu á TikTok. Það segist hún hafa verið kölluð öllum illum nöfnum eftir birtingu myndbandsins. „Myndbandið er klippt þannig að það lúkkar eins og mér sé alveg sama og ég hlægji bara. En hefði teipið rúllað aðeins lengur þá sést að ég segi: „Fyrirgefðu elsku ástin mín þetta átti ekki að vera svona fast“, því þetta átti ekki að vera svona fast. Síðasta hálfa sólarhringinn hef ég verið að fá ógrynni af hatursskilaboðum þar sem ég er kölluð öllum illum nöfnum. Ég tek málefnalegri gagnrýni fagnandi en þetta hefur farið út fyrir öll velsæmismörk þar sem bæði er ráðist á mig og alla í kringum mig,“ segir Laufey og bætir við:
„Ég mun að sjálfsögðu halda áfram að deila með ykkur úr lífinu en núna þarf ég aðeins að jafna mig og stíga til baka og anda inn í þetta. Ég vil minna á það sem ég hef oft sagt, það er allt miklu betra ef við erum bara næs. Við erum öll mannleg og við gerum öll mistök.“