Eldri kona sem slasaðist illa þegar ekið var á hana á gangbraut í Reykjanesbæ liggur enn alvarlega slösuð á gjörgæsludeild. Samkvæmt upplýsingum frá lögreglu er hún ekki í lífshættu.
Íbúum Reykjanesbæjar var mörgum brugið eftir hörmulegt umferðarslys fyrir rúmri viku. Rétt fyrir hádegi á fimmtudeginum síðastliðinn var ekið á eldri hjón sem voru á gangi nærri veitingastað KFC í Njarðvík. Hjónunum var ekið á sjúkrahús þar sem konan reyndist mikið slösuð. Maðurinn var útskrifaður morguninn eftir með minniháttar meiðsl.
Lögreglan hefur varist allra frétta en sendi frá sérstaka tilkynningu þar sem fólk er beðið um að birta alls ekki myndir af vettvangi slyssins. Rannsókn lögreglu stendur enn yfir og bifreiðin verður bráðlega send til yfirferðar til að sannreyna ástand hennar. Samkvæmt heimildum Mannlífs beinist grunur lögreglu að því að sterk sól hafi blindað sýn ökumannsins. Sögusagnir um að ökumaður hafi verið í símanum við akstur eru því rangar. „Málið er í rannsókn og það er búið að taka skýrslur af vitnum og ökumanni sem hefur eðlilega verið í miklu áfalli,“ segir Stefán Sveinsson, aðstoðaryfirlögregluþjónn og yfirmaður rannsóknadeildar lögreglunnar á Suðurnesjum.