Kratar vilja Alþýðuflokk

Sá hluti Samfylkingar sem tilheyrir Krötum er með órólegasta móti eftir að Ágúst Ólafur Ágústsson alþingismaður var sleginn af í leynilegri skoðanakönnun. Könnunin í Reykjavík leiðir i ljós að kvennabylting hefur átt sér stað þar sem fjórir af fimm efstu kandídötum eru konur. Helsti jarðskjálftamælirinn innan Samfylkingar er Birgir Dýrfjörð, gamall og seigur flokkshestur, sem fylgdi Alþýðuflokknum inn í samrunann. Bigir er ævur vegna þess hvernig  Ágúst Ólafur var afgreiddur og telur að  verið sé að refsa manni fyrir að hafa glímt við alkóhólisma og hafi leitað sér bata. Birgir er náinn samherji Össurar Skarphéðinssonar, fyrrverandi formanns Samfylkingar, sem nýlega kom upp úr djúpinu eftir langa þögn með skýrslu um Grænland í farteskinu. Til eru þeir úr þessum ranni sem vilja kveðja Samfylkinguna og endurlífga gamla Alþýðuflokkinn, kalla gamla foringja á dekk og endurlífga gömlu góðu kratagildin. Það erfiða verkefni bíður nú Loga Einarssonar, forrmanns Samfylkingar, að lægja öldurnar og tryggja að  Alþýðuflokknurinn hvíli í friði …