Reykfyllt bakherbergi fullt af konum

Samfylkingin er komin í nokkra klípu vegna leynimakks um frambjóðendurr flokksins í Reykjavík. Aðeins einn karl, Jóhann Páll Jóhannsson, fyrrverandi blaðamaður, hlaut þá náð að sitja í einu ef efstu sætunum þar sem fimm konur hafa raðast eftir að mestu reykskýin í bakherberginu eru tekin að þynnast.  Fæstum kom á óvart að Ágúst Ólafur Ágústsson alþingismaður var sendur til hinna pólitísku himna. Fréttablaðið hefur eftir Degi B. Eggertssyni borgarstjóra að hann hafi verið beðinn að taka sæti á lista en hann hafnaði því eins og oft áður. Því er spáð að Helga Vala Helgadóttir alþingismaður og Kristrún Frostadóttir hagfræðingur muni leiða, sín i hvoru kjördæminu. Við blasir kvennabylting og gríðarlegur kynjahalli. Víst er að allt hefði farið á annan endann ef málinu væri  öfugt farið og einni konu hefði skolað á land í leynimakkinu og karlar hefðu hrúgast inn á listann. Það verður áhugavert að sjá hvort flokkur jafnréttis og jöfnuðar nær að rétta hlut karla og róa Krata og aðra sem telja að jafnrétti eigi að ganga í báðar áttir …