Bókamessunni víðfrægu í London sem hefjast átti í næstu viku og standa frá 10. til 12. mars hefur verið aflýst af heilbrigðisástæðum vegna kórónaveirufaraldursins. Messan er einn alstærsti alþjóðlegi bókmenntaviðburður í heimi og þar eru árlega gerðir samningar upp á milljarða.
Skipuleggjendur hátíðarinnar Reed Exhibitions tilkynntu í morgun að búið væri að aflýsa bókamessunni sem yfir 25.000 útgefendur, höfundar og umboðsmenn höfðu staðfest þáttöku í. Reyndar höfðu ýmis af stærri útgáfuhúsum veraldar, svo sem Penguin Random House, HarperCollins Hachette og Amazon þegar afboðað þátttöku sína í messunni og því ljóst að hátíðin yrði ekki svipur hjá sjón. Margir útgefendur höfðu einnig lýst yfir gremju sinni vegna þess hve langan tíma það tók skipuleggjendurna að aflýsa bókamessunni þar sem frestunin á þeirri ákvörðun stefndi heilsu fólks í hættu og væri fjárhagslegt álag fyrir útgefendur.
Bókamessan í London er ekki eini stóri bókmenntaviðburðurinn sem hefur verið sleginn af, búið er að aflýsa bæði Salon du Livre í París og Bókamessunni í Leipzig sem báðar áttu að hefjast síðar í mánuðinum.