Sláandi þögn Samherja

Þær fréttir frá Færeyjum að Samherji hafi beitt svikum til að létta á skattgreiðslum eru sláandi. Færeyska Sjónvarpið og það íslenska sameinuðust í rannsóknavinnu sem leiddi í ljós þá staðhæfingu að íslenskir sjómenn á Namibíuskipum auðhringsins hafi verið lögskráðir á færeyskum kaupskipum og fyrirtækið nýtt sér niðurgreiðslur á sköttum til að létta á launum. Sérstaka athygli vekur að Þorsteinn Már Baldvinsson forstjóri kýs að svara hvorki Færeyingum né Íslendingum en hann hefur verið óvenju yfirlýsingaglaður undanfarið. Ásakanirnar um skattsvik á kostnað Namibíumanna eru grafalvarlegar og víst að það yrði fréttamönnum dýrkeypt ef um rangfærslur væri að ræða. Síðast í gær var hann með stórar yfirlýsingar á heimasíðu Samherja um Jóhannes uppljóstrara Stefánsson sem hann segir hafa logið upp á sig og aðra Samherja morðtilraun í Suður-Afríku. En þegar kemur að meintum svikum í Færeyjum ríkir þögnin ein …