Síðastliðinn mánudag sendi Vatíkanið frá sér tilkynningu þess efnis að kaþólska kirkjan myndi ekki leggja blessun sína á hjónabönd samkynhneigðra. Slíkt sé val og ekki í samræmi við fyrirætlan guðs og flokkist því sem synd: „Guð getur ekki og mun ekki blessa synd.“
Þessa ákvörðun samþykkti Frans páfi, en honum hefur títt verið hrósað fyrir opna og jákvæða umræðu í garð samkynhneigðra. Því voru þetta vonbrigði fyrir kaþólikka sem vonast höfðu til þess að Vatíkanið, með Frans í páfastólnum, myndi bæta viðhorf kaþólsku kirkjunnar á samkynhneigð.
Páfinn sagði í viðtali árið 2019 að samkynhneigðir væru börn guðs og ættu rétt á að eignast fjölskyldu. Hann sagði jafn framt að gera þyrfti lög sem samþykktu óvígða sambúð þeirra.
Fljótlega eftir þessi ummæli páfans sagði Vatíkanið að ummæli hans hefðu verið tekin úr samhengi og engra breytinga væri að vænta.