Patrekur Jóhann Kjartansson Eberl lést af slysförum 12. maí 2021, aðeins 15 ára að aldri. Honum er lýst sem hugrökkum, metnaðarfullum og lífsglöðum ungum manni sem var ófeiminn við að vera hann sjálfur.
Patrekur fæddist á Selfossi 24. mars 2006 og fyrstu æviárin bjó fjölskyldan
á Selfossi og í Hveragerði. Síðar fluttu þau í Þykkjabæ þar sem þau voru með hross og sauðfé. Patrekur Jóhann var metnaðarfullur framtíðarbóndi og var góður við þá sem
minna mega sín, bæði menn og dýr. Patrekur átti hænur, endur, kindur og hesta sem hann hugsaði vel um. Hann var nemandi í 9. bekk í Grunnskólanum Hellu þar sem hann átti góða vini og félaga.
Samúel Örn Erlingsson, umsjónarkennari Patreks, minnist frábærs nemanda í minningargrein í Morgunblaðinu. Hann segir það miki reiðarslag þegar svona ungur drengur deyr og það braki í öllum stoðum litla grunnskólans á Hellu enda hafi Patrekur verið sterkur persónuleiki, líflegur, gamansamur, glaðlegur og stríðinn. „Mikill harmur er kveðinn að fjölskyldu, vinum og sannarlega öllum í litlu samfélagi. Enginn er viðbúinn slíku höggi, allir finna til. Hann var hugmyndaríkur prakkari, en prakkarastrikin voru aldrei ætluð til að meiða, heldur til að gleðja. Takk fyrir allt og allt elsku vinur, við söknum þín öll,“ segir Samúel Örn.
Ásmundur Friðriksson, þingmaður Sjálfstæðisflokksins, minnist líka Patreks með fallegum orðum í minningargrein. Þar rifjar þingmaðurinn meðal annars upp þegar Patrekur bjargaði honum í hlöðunni fyrir ári síðan. „Þétt og sterkt handtakið var fyrsta snerting okkar Patreks Jóhanns sem horfði beint í augun á þeim sem hann heilsaði. Það gera alvörumenn og það var ekki eins og hann væri nýlega orðinn 14 ára gamall. Það er súrrealískt að ég sé nú að fylgja lífgjafanum til hinstu hvílu. Patrekur kvaddi okkur umkringdur því lífi sem hann hafði aðstoðað við að koma á legg. Harmur er kveðinn að foreldrum hans og fjölskyldu og við öll dofin af sorg,“ segir Ásmundur.
Frændi Patreks kveður yndislegan frænda sinn með mikilli sorg. „Ýmsar tilfinningar hafa vaknað síðan þú lést, sorg, reiði, sektarkennd og örmögnun. En líka gleði yfir þeim tíma sem ég átti með þér, þrátt fyrir að hann hafi verið allt of stuttur. Þín verður ávallt saknað, litli frændi, og ég vona að þú sért sáttur með Yamaha-húðflúrið sem ég fékk mér til þess að minnast þín. Þangað til næst og eilíf ást,“ segir frændinn.
Útförin Patreks fer fram frá Garðakirkju í dag klukkan 15. Streymt verður frá útförinni hér.